«ئالان سلیفی» نوێنەری ئیدارەی خۆسەری کوردستانی سووریا لە هەولێر لە وەڵامی پرسیارێکی کوردپرێسدا کە چ هەوڵێکیان ئەنجام داوە بۆ دوور کەوتنەوەی بەڕێوەبەرایەتی خۆسەر و هەرێمی کوردستان عێراق لەو گرژییەی کە ئەمڕۆ بەهۆی پێکدادان لەنێوان هێزی پێشمەرگە و یەپەگە ڕوویدا، ڕایگەیاند: ئەمڕۆکە کوردستانی سووریا لە دۆخێکی هەستیاردایە و پێویستە حزبە کوردییەکان دەرک بەم بابەتە بکەن و بۆ چارەسەر کردنی کێشەکان ڕێکبکەون.

ناوبراو درێژەی دا گرژیی لە بەرژەوەندیی کوردەکانی سووریادا نییە و هیچ ڕەوتێکی کوردی سوودی لێوەرناگرێت.

ئالان سلیفی وتیشی: ئەمڕۆکە کوردستانی سووریا ئارامە دانووستانی کوردی-کوردی خەریکە بەڕێوەدەچێت و ئێمە دەمانەوێت هەموو ڕەوتە کوردییەکان لەمبارەوە یارمەتیمان بدەن.

نوێنەری ئیدارەی خۆسەری کوردستانی سووریا لە هەولێر وتیشی: لەبارەی ڕووداوەکانی ئەم دواییەوە هەموومان بڕوامان وایە پێکدادان لەبەرژەوەندیی هیچ لایەنێکدا نییە و پێویستە کوردەکان بە گفتوگۆ کێشەکانیان چارەسەر بکەن.

کۆدی هەواڵنێر: 60113