کوردپرێس:

لیلوا عەبدوڵڵا هاوسەرۆکی ئەنجومەنی سەربازیی دەیرەزوور کە بە ڕەگەز عەرەبی عەشیرەی شەمری دەیرەزوورە لە لێدوانێکدا بە پەیمانگای سەنتەری ویلسۆنی وتووە عەرەبەکانی دەیرەزوور نێوانیان لەگەڵ هێزەکانی کورد و عەرەبی سووریا ناسراو بە هێزەکانی سووریای دیموکرات باشە و پشتگیریی مانەوەی ئەو هێزانە لە دەیرەزوور دەکەن کە بە عام پارێزگایێکی عەرەبنشینە.

لیلوا عەبدوڵڵا لەبارەی مەترسیی یاخی بوون و ناڕەزایی دەربڕینی قەبیلەکانی دەیرەزوور دژی هێزەکانی سووریای دیموکرات و ناڕازی بوونی عەرەبەکان بەرانبەر بە مانەوەی ئەو هێزانە لە دەیرەزوور وتوویەتی: شۆڕشی قەبیلەکانی ئەو پارێزگایە دژی هێزەکانی سووریای دیموکرات ڕوو نادات و ئێمە لەو ناوچەیە دەمێنینەوە لەبەر ئەوەی هاووڵاتییان پشتگیریمان لێدەکەن.

هاوسەرۆکی ئەنجومەنی سەربازیی دەیرەزوور جەختیشی کردەوە کە عەرەبەکان بە نیسبەت وەرگرتنی پۆستەوە پۆستی کەمتریان لە کوردەکان وەرگرتووە و عەرەب داوای پۆستی زیاتر دەکات.

لیلوا عەبدوڵڵا لە وەڵامی ئەو پرسیارەشدا کە ئایا کوردەکان زۆرینەی دەسەڵاتیان لە ئیدارەی خۆسەری باکووری سووریا و لە نێو هێزەکانی سووریای دیموکرات بەدەستەوەیە یان خەیر، وتوویەتی: لە دیدی ئێمەوە جیاوازی لە نێوان کورد و عەرەب و ئاشووریدا نیە و ئەوانەی ئەم باسانە دێننە ئاراوە نیازی تەنگەژەخولقاندنیان هەیە.

ناوبراو لەبارەی مەترسیی چالاک بوونەوەی شانە نووستووەکانی داعش لە دەیرەزوور هۆشداریی دا.