بەپێی هەواڵی کوردپرێس، دوێنێ لاهور شێخ جەنگی، هاوسەرۆکی یەکێتی نیشتیمانی کوردستان بە سەرۆکایەتی وەفدێک سەردانی بەغدای کرد و جیا لە کۆبونەوەی لەگەڵ ئیمانوێل ماکرۆن سەرۆکی فەرەنسا، ژمارەیێک کۆبوونەوەی دیکەی لەگەڵ بەرپرسانی باڵای عێراق ئەنجام دا.

دەربارەی کۆبوونەوەکەی لەگەڵ سەرۆکی پەرلەمانی عێراق، لاهوور شێخ جەنگی لە هەژماری تایبەتی خۆی لە تۆڕی کۆمەڵایەتی فەیسبووک نووسیویەتی: "لە درێژەی سەردانەکەمان بۆ بەغدا، لەگەڵ محەمەد حەلبووسی سەرۆکی ئەنجومەنی نوێنەرانی عێراق کۆ بووینەوە. لەم کۆبوونەوەیەدا باسمان لە پەیوەندییەکانی نێوان هەرێم و بەغدا و چارەسەرکردنی کێشە هەڵپەسێردراوەکان کرد".

ناوبراو ئاماژەی بەوەش کردووە ،"هەردولا جەختمان کردەوە لە گرنگی جێبەجێ کردنی ڕێکارە دەستورییەکان بۆ چارەسەرکردنی کێشەکانی نێوان حکوومەتی فیدراڵ و حکوومەتی هەرێم و هاوڕابووین لەسەر پێویستیی جێبەجێ کردنی ئامادەکارییەکان بۆ هەڵبژاردنی پێشوەخت".

کۆدی هەواڵنێر: 60113