بەپێی هەواڵی کوردپرێس، ئاڵدار خەلیل، ئەندامی دەستەی سەرکردایەتیی پەیەدە ڕایدەگەیێنێت: خولی دووۆەمی دانووستانی یەکگرتنی کوردانی سووریا درێژەی هەیە بەڵام لەسەر سێ بابەتی بەڕێوەبەرایەتی، ڕاهێنان و پرسە بەرگرییەکان ژمارەیێک کێشە هەیە.

ناوبراو درێژەی دا لە ئەنجامی گفتوگۆ و دانوستانەکاندا توانیومانە 24 حزبی سیاسی پێکەوە کۆ بکەینەوە. تەنانەت ئەگەر لە زۆرینەی پرسەکاندا لایەنەکان ناکۆک بن خولی دووهەمی دانوستانەکان درێژەی هەیە. بەهیچ شێوەیێک زەبر لە دەسکەوتەکانی خەڵک نادەین و هیچ ڕێککەوتنێکیش دەسکەوتەکان ناخاتە مەترسییەوە.

ئاڵدار خەلیل لە درێژەدا دەڵێت: لەبواری بیروڕاوە هەندێک جار جیاوازیمان هەیە و هەوڵ ئەدەین کۆتاییان پێبێنین. ئەم پڕۆژەیە پڕۆژەیێکە کە مافی هەموو میللەتەکان دەستبەر دەکات و ژیانێکی پێکەوەیی دادەمەزرێنێت. ساڵانێکە ئەم پڕۆژەیە دەستی پێکردووە و درێژەی هەیە، بەڵام هەندێک ڕەوتی لایەن هێرش دەکەنە سەری.

کۆدی هەواڵنێر: 60113