کوردپرێس:

دیجیتاڵ میدیای ڕووداو رایگەیاند، ژمارەیێک فەرماندەی پاسەوانی سنووری عێراقی لە برادۆست چوونەتە لای پەکەکە بۆ هەماهەنگیکردن و وەستانی شەڕ، لەوکاتەدا فڕۆکەی بێ فڕۆکەوان بۆردوومانی کردوون و تاوەکوو ئێستا نازانرێت ژمارەی قوربانییەکان چەندن.

کۆبوونەوەکە لە کوێستانی بێرمێ دینداران بووە لە سنووری شارۆچکەی سیدەکانی قەزای سۆران. بەڕێوەبەری ناحیەی سیدەکانیش دەڵێت "دوو فەرماندەی پاسەوانی سنوور کوژراون".

ئیحسان چەلەبی، بەڕێوەبەری ناحیەی سیدەکان بە تۆڕی میدیایی رووداوی راگەیاند، کاژێر 3:45ی ئێوارەی ئەمڕۆ سێشەممە، چەند فڕۆکەیەکی بێفڕۆکەوان لە ناوچەی برادۆست، ئۆتۆمبێلێکی پاسەوانی سنووری عێراقیان کردووەتە ئامانج و بەهۆیەوە چەند پاسەوانێکی سنوور کوژراون کە عەمیدێک و عەقیدێکی کوردیان تێدایە.

ئیحسان چەلەبی گوتیشی "بەهۆی سووڕانەوەی بەردەوامی فڕۆکە تورکییەکان تاوەکو ئێستا نەتوانراوە تەرمی کوژراوەکان بهێنرێتەوە".

بەپێی زانیارییەکانی پەیامنێری رووداو، هەشت کەس لە بەرپرسانی عێراقی و پەکەکە بەشداریی کۆبوونەوەکە بوون.