کوردپرێس:

سەرچاوە خۆجێییەکان لە پارێزگای حەسەکە رایانگەیاند، ئێوارەی ڕۆژی چوارشەممە 15ی تەمووزی 2020کاژێر 8:00 چەند تەقینەوەیێک لە سەنتەری شاری حەسەکەی کوردستانی سووریا روویان داوە و تەقینەوەکان لەنێو کۆگایەکی چەک و تەقەمەنی بوون.

بەپێی زانیارییەکان، تەقینەوەکان لە کۆگایەکی چەک و تەقەمەنیی هێزەکانی سووریای دیموکرات - هەسەدەیە و بەهۆیانەوە هەشت کەس برینداربوون، کە برینی هەموویان سووکە.

تەلەڤزیۆنی ڕووداو ڕایگەیاند، لە کۆگایێکی چەک و تەقەمەنیی هەسەدە لە حەسەکە تەقینەوە دروست بووە، دەنگی پێنج تەقینەوەی بەهێز بیستراون و ئاگرێکی گەورەش کەوتووەتەوە، هۆکاری تەقینەوەکان دیارنییە، بەڵام دەگوترێت کە بەهۆی بەرزبوونەوەی پلەکانی گەرماوە بووە.

کۆگاکە چەکی قورس، سووک و مامناوەندی تێدایە و دوورە لە شوێنی نیشتەجێبوونەوە.

تاوەکو ئێستاش هێزەکانی سووریای دیموکرات هیچ راگەیێندراوێکی لەبارەی تەقینەوەکانەوە بڵاونەکردووەتەوە.