کوردپرێس:

بە گوێرەی ئەو زانیارییانەی لە سەرچاوە ئاگادارەکانەوە دەست کەوتوون تیرۆریستانی بەندکراوی داعش لە بەندیخانەی سینای سەر بە گەڕەکی گوێران لە باشووری حەسەکە هەڵمەتێکی یاخیبوونیان ساز کرد.

تەلەڤزیۆنی ڕووداو لەو بارەیەوە ڕایگەیاند یاخیبوونەکەی داعش کاتژمێر 9ی شەو بە کاتی ناوچەکە لە بەندیخانە دەستی پێکرد و تا دەمەوبەیان بەدەوام بوو و زیندانییەکان لەو ماوەیەدا دەستیان کردبوو بە ڕووخاندنی دیوار و شکاندنی دەروازەکانی بەندیخانە.

هەر بە گوێرەی ئەو زانیارییانەی لە سەرچاوە خۆجێیییەکانەوە دەست کەوتوون هاوکات لەگەڵ ئەم یاخیبوونە کۆپتەرەکانی هاوپەیمانیی نێودەوڵەتیی دژەداعش بە ئاسمانی حەسەکەدا دەسووڕایەوە و هێزەکانی ئاسایشی ناوخۆی سەر بە سوپای سووریای دیموکرات کۆتاییی بە یاخیبوونەکە هێنا و زیندانییانی داعش نەگەشتە ئامانجەکەیان.

شایانی باسە ئەمە جاری سێهەمە کە لە ماوەی یەک مانگی ڕابردوودا زیندانییانی داعش لە بەندیخانەکانی باکوور و خۆرهەڵاتی سووریا هەڵمەتی یاخیبوونیان داوە.