تورکەکانی ڤیەن هەڵدەکوتنە سەر خۆپیشاندانێکی کوردەکانی ئەو شارە
پوختەی هەواڵ
کوردپرێس:
کوردەکانی دانیشتووی ڤیەنی پێتەختی وڵاتی نەمسا دژی هێرش و دەستدرێژیی تورکیا بۆ سەر گوندێکی کۆبانێ کە شەهیدبوونی چەند هاووڵاتیی لێکەوتەوە خۆپیشاندانێکی ناڕەزایییان ساز کرد و لە خۆپیشاندانەکەدا ژمارەیێک تورکی دانیشتووی ئەو شارە هەڵیانکوتایە سەر هاووڵاتییانی کورد و گرژی و تێهەڵچوون لە نێوانیان ڕووی دا.
پۆلیسی ڤیەنی پێتەختی وڵاتی نەمسا ڕایگەیاند لە تێهەڵچوونی کوردەکان و تورکەکان لە شاری ڤیەن دوو هێزی پۆلیسی ئەو شارە بریندار بووە.
ئاژانسی هەواڵی ئاسۆشیتدپرێس نووسیویەتی هەفتەی ڕابردوو چەند خۆپیشاندانێکی ناڕەزایی لە لایەن کوردەکانی نەمساوە بەڕێوە چوو و تورکەکان هەڵیانکوتایە سەر دوو خۆپیشاندان و گرژی لە نێوانیان دروست بوو.
هەر بە گوێرەی ڕاپۆرتەکەی ئاسۆشیتدپرێس خۆپیشاندانی کوردەکان تا شەوی هەینی بەردەوام بوو و لە تێهەڵچوونی تورکەکان و کوردەکاندا بە بەرد و تەقەمەنی لە یەکیان دا و لەو ڕووداوانەشدا دوو هێزی پۆلیسی ڤیەن بریندار بوون.
پۆلیسی نەمسا سێ کەسی دەستبەسەر کردووە و هۆشداریی ئەوەشی داوە کە لە ڕۆژانی داهاتووشدا خۆپیشاندان بەردەوام دەبێت و مەترسیی گرژی و تێهەڵچوونی دووبارە لە ئارادایە.
هەروەهاش پۆلیسی ڤیەن ڕایگەیاندووە کە هێزەکانی پۆلیس ئامادەی بەرپەرچدانەوەی هەموو جۆرە گرژی و توندڕوەییێکن.
بۆچوونی بەکارهێنەران