بەپێی هەواڵی کوردپرێس، لیوا روكن قاسم محەمەدی لە لێدوانێكی رۆژنامەوانییدا رایگەیاند كە ئۆپەراسیۆنەكە بەپێی پلانێكی تۆكمە بە هاوبەشی لەنێوان هێزەكانی فەرماندەیی ئۆپەراسیۆنەكانی سەڵاحەددین، سامەڕا، فیرقەی نۆی زرێپۆش و هێزەكانی كۆماندۆ و پۆلیسی فیدراڵ و حەشدی شەعبی ئەنجام دراوە كە لە میانیدا پاڵپشتی ئاسمانی لەلایەن هێزی ئاسمانیی و فڕۆكە جەنگییەكانی سوپا دابین كرابوو.

فەرماندەیی هێزی وشكانیی عێراق، ئاشكرایشی كردووە كە لە میانی ئۆپەراسیۆنەكەدا، ژمارەیێک حەشارگە و تونێلی تیرۆریستانی داعش لەو ناوچانە خاپووركراون و وتیشی: "ئۆپەراسیۆنەكە سەركەوتووانە ئەنجام دراوە كە كاریگەریی لەسەر كەم كردنەوەی جموجۆڵی تیرۆریستانی داعش لەو ناوچانە دروست كردووە".

جەختیشی لەسەر ئەوە كردەوە كە ئۆپەراسیۆنی هێزە ئەمنییەكان بە ئامانجی راوەدونانی داعش درێژەی دەبێت تا ئەو كاتەی ئاسایش و سەقامگیری لە ناوچە سنوورییەكانی نێوان پارێزگاكانی سەڵاحەددین، دیالە و كەركووک پتەوتر دەبێت.

ئەمەیش دوای ئەوە دێت لە دوو رۆژی رابردوودا، هێزە عێراقییەكان قۆناغی دووەم و سێیەمی ئۆپەراسیۆنی "پاڵەوانەكانی عێراق"یان لە ناوچەكانی نێوان رۆژهەڵاتی سەحەڵاددین و رۆژئاوای دیالە و باشووری رۆژئاوای كەركووک ئەنجام دابوو.

کۆدی هەواڵنێر: 60113