کوردپرێس:

ئیدارەی خۆسەری باکوور و خۆرهەڵاتی سووریا لە بەیاننامەیێکدا ڕایگەیاند هەموو ڕێکارەکان دەگرنە بەر بۆ پاراستنی هاووڵاتییان لە ڤایرۆسی کۆرۆنا و بەو مەبەستەش بڕیاریان داوە بە داخستنی سەرجەم قوتابخانە و زانکۆ و پەیمانگا و سنوورەکانیان.

بەپێی هەواڵێکی هاوارنیوز لە بەیاننامەکەدا نووسراوە: بە بڕیاری ئیدارەی خۆسەر ڤایرۆسی کۆرۆنا بۆتە مەترسی و هەڕەشەیێکی جیهانی و هەر بەو بۆنەیەشەوە کۆمەڵێک ڕێکارمان گرتۆتە بەر بۆ ئەوەی گیانی هاووڵاتییانمان بپارێزین.

ئیدارەی خۆسەر ڕایگەیاندووە لە 14ی مارچی 2020ەوە سەرجەم قوتابخانە و زانکۆ و پەیمانگا و دەروازە سنوورییەکان تا کاتێکی نادیار دادەخرێن.

هەموو دەروازە سنوورییەکانیش بە ڕووی هەموواندا داخراو دەبێت و هاووڵاتییانی سووریی باکوور و خۆرهەڵاتی سووریاش تەنها تا ڕۆژی سێشەمە دەرفەتیان پێ دەدرێت بگەڕێنەوە خاکی خۆیان.

کۆدی هەواڵنێر: 60101