کوردپرێس: راگەیەندنەکانی پۆلیس و حکوومەتی تورکیا رایانگەیاند: لە هەڵمەتێکی پۆلیسدا بەبۆنەی نزیکبونەوەی ئاهەنگی سەری ساڵ، توانیویانە 94 کەس دەستگیربکەن کە گومانی ئەوەیان لێدەکرێت پەیوەندییان لەگەڵ رێکخراوی داعش هەبووە.

دووساڵ بەرلەئێستا و لەکاتی بەڕێوەچوونی ئاهەنگەکانی سەری ساڵ لە 2017-دا چەکدارێکی سەربە گرووپە توندڕەوەکان دەستڕێژی گولەی لە بەشداربووانی یانەیێکی شەوان لە ئیستانبول کرد و بەهۆیەوە 39 کەس کوژران، پاش ئەو رووداوە حکوومەتی تورکیا لەسەروبەندی نزیک بوونەوەی ئاهەنگەکانی سەری ساڵدا کێوماڵی ئەمنی ناوچە قەرەباڵغەکان دەکات.

لەوباریەوە، ئاژانسی ئەنادۆڵی تورکی بڵاویکردەوە پۆلیسی روبەروبونەوەی تیرۆر هەڵمەتێکی دەستگیرکردنی گومانلێکراوانی لەشارەکانی ئەنقەرە، کەیسەری، ئەدەنە و باتمان دەستپێکردوە.

بەگوێرەی زانیارییەکان، لەکاتژمێرەکانی سەرەتای دەستپێکردنی هەڵمەتەکەدا پۆلیسی ئەدەنە 22 کەسیان بەتۆمەتی جیاواز لەوانە هەڵگرتنی چەک و تەقەمەنی و دۆکیومنتی مەترسیدار دەستگیرکردووە.

کۆدی هەواڵنێر: 60113