کوردپرێس: لە کۆنگرەیێکی رۆژنامەنووسیدا بەهزاد دەروێش وتەبێژی کۆنگرەی هەشتەمی یەکگرتووی ئیسلامیی کوردستان وتی: رۆژی شەممە کۆنگرەی یەکگرتووی ئیسلامیی کوردستان کرایەوە و دوای نیوەرۆ لە دانیشتنی دووەمدا دەنگدان بۆ ئەنجوومەی چاودێری و ئەندامانی سەرکردایەتی و ئەمینداری گشتی یەکگرتوو بەڕێوەچوو.

وتەبێژی کۆنگرەی هەشتەمی یەکگرتووی ئیسلامیی کوردستان باسی لەوەکرد، کە لە پرۆسەی دەنگدان کە کۆتایی هاتووە 4 دەنگی پووچەڵ و 10 دەنگی بەتاڵ بوونی هەبووە و لە پرۆسەکەدا مامۆستا سەلاحەددین محەمەد بەهائەدین 546 دەنگی ئەندامانی کۆنگرەی بەدەست هێناوە و ئەبووبەکر کاروانیش 348 دەنگی بەدەست هێناوە و بەوپێشەش سەلاحەددین بەهائەدین بووە ئەمیندانی گشتیی یەکگرتووە.

بەهزاد دەروێش هەروەها روونی کردەوە، کە 43 ئەندامیان بۆ سەرکردایەتی یەکگرتوو پێویستە 16یان وەک بەرپرسی مەڵبەندەکان دەنگیان پێدراوە و ئەوانی تریش دەکەونە رۆژی یەکشەممە.

ناوبراو وتیشی، رۆژی یەکشەممە دواین ڕۆژی کۆنگرە دەبێت و جگە لە ستراتیژی یەکگرتووی ئیسلامیی کوردستان، ئەمینداری گشتیی یەکگرتووی ئیسلامی وتاری کۆتایی پێشکەش دەکات.

رۆژی شەممە 28/12/2019 بە ئامادەبوونی 900 ئەندام یەکگرتووی ئیسلامیی کوردستان لە شاری هەولێر کۆنگرەی هەشتەمی خۆی دەست پێکرد کە وابڕیارە سبەی 29/12/2019ش بەردام بێت.

کۆدی هەواڵنێر: 60113