کوردپرێس:

ڕۆژی پێنجشەممە 12ی کانوونی یەکەمی 2019 دەنگۆیێک بڵاو بوویەوە کە گوایا چەكدارێك لە مەیدانی وەسبە لەناوەڕاستی شاری بەغدا دەستڕێژی گوللـەی بەناو خۆپیشاندەراندا كردووە و پێنج خۆپیشاندەر دەكوژێت، بەپێی زانیاریەكانیش ئەو چەكدارە دوای دەستگیركردن و كوشتنی، لەناوەڕاستی مەیدانەكەدا هەڵواسراوە.

بەگوێرەی زانیارییەكان، چەكدارەكە تەمەنی 17 ساڵ بووە و ئەوەش لە کاتێکدا بنەماڵەکەی ڕەتی دەکەنەوە تەقەی لە خۆپیشاندەران کردبێت.

بەپێی گرتەیێكی ڤیدیۆییش، ئەو چەكدارە لەلایەن خۆپیشاندەرانەوە دەستگیر كراوە و دوای كوشتنی بە ستوونێكی ترافیك لایتدا لە گۆڕەپانی وەسبە هەڵدەواسرێت.

نوێنەرایەتی نەتەوەیەكگرتوەكان لە عێراق كوشتن و هەڵواسینی تەرمەکەی لە گۆڕەپانی وەسبەی بەغدا شەرمەزار كرد و داوای كرد ئەنجامدەرانی ئەو تاوانە بدرێنە دادگا.

لە بەیاننامەیەكی نوێنەرایەتی نەتەوەیەكگرتوەكان لە عێراقدا هاتووە، بەتوندترین شێوە كوشتن و هەڵواسینی گەنجێك لە گۆڕەپانی وەسبەی بەغدا سەركۆنە دەكەین و بە كردەوەیێكی ناپەسەند و قەبووڵنەكراوی دەزانین.

باسی لەوەش كردووە، ناكرێت تاكەكان بە دەستی خۆیان یاسا جێبەجێ بكەن و پێویستە هەر گومانلێكراو و تۆمەتبارێك بە ئەنجامدانی توندوتیژی بەرامبەر بە خۆپیشاندەران ڕادەستی لایەنە فەرمییەكان بكرێت بە بێ ئەوەی رووبەڕووی ئەشكەنجە و كردەوەی تاوانكاری بكرێت.

نوێنەرایەتیی نەتەوەیەكگرتووەكان داواشی لە حكوومەتی عێراق كردووە، سەرجەم ئەو كەسانە دەستگیر و راپێچی بەردەم دادگا بكات، كە دەستیان لە كوشتن و هەڵواسینی گەنجەكەی گۆڕەپانی وەسبەدا هەبووە.