کوردپرێس:

ئایەتوڵڵا عەلی سیستانی مەرجەعیەتی باڵای ئایینیی شیعەکانی عێراق لە نوێترین پەیامیدا کە لە رێگەی نوێنەرەکەیەوە لە وتاری نوێژی هەینی بڵاوی کردەوە، داوای کرد سەرۆک وەزیران و کابینەی نوێی حکوومەتی عێراق لە وادەی دیاریکراوی دەستووریدا دیاری بکرێن.

نوێنەری ئایەتوڵڵا سیستانی لە نوێژی هەینیدا ڕاشیگەیاند، پێویستە رێگە بە دەستوەردانی دەرەکی نەدرێت لە یەکلایی کردنەوەی کابینەی نوێ، هەروەک بێ لایەن بوونی خۆیشی لەو پرسە ڕاگەیاند.

سیستانی جارێکی تر رشتنی خوێنی خۆپیشاندەرانی سەرکۆنە کرد و داواشی کرد، خۆپیشاندەران رێگە نەدەن کەسانی تێکدەر بخزێنە ناویانەوە و خۆپیشاندانە ئاشتییانەکانیان بۆ مەرامی تایبەتی و بۆ زیان پێگەیاندن بە مڵکوماڵی گشتی بقۆزنەوە.

هەفتەی ڕابردوو دوای پەیامی سیستانی کە لە وتاری نوێژی هەینیدا خوێنرایەوە عادل عەبدولمەهدی وازهێنانی لە پۆستی سەرۆکایەتیی ئەنجومەنی وەزیران ڕاگەیاند.