بەپێی هەواڵی کوردپرێس، پارێزگای هەولێر لە راگەیەندراوێکدا ئاشکرای کردووە، لە پەیوەندییەکی تەلەفۆنیدا مەسروور بارزانی سەرۆکوەزیرانی هەرێمی کوردستان لەگەڵ ئومێد خۆشناو پارێزگاری هەولێر، فەرمانی کردووە هەموو جۆرێک لە کارکردن بە سیستمی غاز‌ رابگیرێت و نابێت بە هیچ جۆرێک بەکار بهێنرێت.

پارێزگای هەولێر داواشی لە هاووڵاتیان کردووە، هەموو کارکردنێک بەم سیستمی غازە رابگرن و هاوکاری تیمەکانی بەرگریی شارستانی و پۆلیسی شارەوانی و نەوت و کانزاکان و تیمەکانی قایمقامیەت و ناوەندی قەیرانەکان بن.

ئەم بڕیارە دوای ئەوەدێت، لەماوەی رابردوودا چەند رووداوێکی تەقینەوەی سیستمی غاز روویان داوە و دیارترینیان لە گەڕەکی کازیوەی سلێمانی کە 15 کوژراو و 12 برینداری لێکەوتەوە، هەروەها شەوی رابردوو لە پارێزگای دهۆک کە بووە هۆی گیانلەدەستدانی 4 کەس و بریندار بوون 33ی دیکە.