بەپێی هەواڵی کوردپرێس، سەگڤان سندی، جێگری سەرۆکی لیژنەی ئاسایش و بەرگری لە پەرلەمانی عێراق بە ماڵپەڕی فەرمیی پارتی وت: ئێمە لەگەڵ سەرۆکوەزیرانی تازەی عێراق کۆبووینەوە و داوامان کرد کە ئەو کەسانەی لەسەر سنووری هەرێمی کوردستان بە هۆی بۆردوومانەکان شەهید بوون، وەکو شەهید هەژمار بکرێن لە دەزگای شەهید، ئەویش لای خۆی نووسی و زۆری پێ باش بوو و رەزامەندیی نیشاندا، بۆیە ئەو کەسانە وەکو شەهید هەژمار دەکرێن و موچەی شەهیدانە بدرێتە وارسەکانیان.
سندی وتیشی: داواشمان کرد کە ئەوانەی زیانیان بەرکەوتووە و گوندەکانیان چۆڵ کردووە، بگەڕێنەوە بۆ گوندەکانیان و قەرەبووش بکرێنەوە، چوونکە زیانی زۆریان بەرکەوتووە.
ناوبراو دەشڵێت: ئەوانەی بە هۆی بۆردوومانەکان لەسەر سنوورەکانی هەرێمی کوردستان شەهید بوون، ژمارەیان 120 کەسە، کە بڕیارە بە شەهید هەژمار بکرێن و بخرێنە سەر دەزگای شەهید لە عێراق و مووچەش لەلایەن عێراقەوە بدرێتە وارسیان.
پێشتر وەزیری دەرەوەی عێراق ڕایگەیاند، كە بەهۆی بۆردومان و تۆپبارانەكانی توركیاوە لە هەرێمی كوردستان زیاتر لە 120 كەس گیانیان لەدەست داوە.