بەپێی هەواڵی کوردپرێس، دانا عەبدولکەریم، وەزیری ئاوەدانکردنەوەی حکوومەتی هەرێم دوای کۆبوونەوەی شاندی پارتی و گۆڕان، لە کۆنفرانسێکی ڕۆژنامەوانیدا ڕایگەیاند: "لە کۆبوونەوەکانمان لەگەڵ شاندی پارتی و یەکێتی باسی کێشەی ئەمنی هەرێمی کوردستان کراوە، هەروەها باسی کۆمەڵێک بابەتی جددی و هەستیار کراوە کە پێویستی بە چارەسەرکردن هەیە".

ناوبراو وتیشی، "تا ئێستا حکوومەتێکی یەکگرتوو و ئیدارەیەکی یەکگرتوومان نیە، جگە لەوەی کە هێزێکی نیشتیمانیمان نییە، بۆیە دوو ئیدارەیی هەموو کات هەڕەشەیە لەسەر قەوارەی هەرێمی کوردستان، چوونکە ئێمە هێز و پارەمان دابەشە و لە ڕووی جورگرافیشەوە دابەش کراوین".

هەفتەی ڕابردوو، قوباد تاڵەبانی، جێگری سەرۆکی حکومەتی هەرێم بەشداری کۆبوونەوەی ئەنجومەنی وەزیرانی نەکرد، دواتر شاندێکی یەکێتی سەردانی لایەنەکانی کرد و نیگەرانی خۆیان لە حکومڕانی هەرێم دابووە لایەنەکان.