بەپێی هەواڵی کوردپرێس، ئەمڕۆ یەکشەممە 9ی تشرینی یەکەمی 2022، پەرلەمانی کوردستان بۆ دەنگدان لەسەر پێشنیازە یاسای درێژ کردنەوەی تەمەنی خۆی کۆ بوویەوە، کە لەلایەن فراکسیۆنەکانی پارتی و یەکێتی و کەمە نەتەوەکان و بەشێکی فراکسیۆنی گۆڕانەوە پشتگیری دەکرا.

دوای دەستپێکردنی دانیشتنەکە پێشنیازە یاساکە خرایە دەنگدانەوە و بە زۆرینەی دەنگ و بەدەنگی 80 پەرلەمانتار پەسەند کرا.

ئەو پێشنیازە یاسایە ناڕەزایی زۆری بەدوای خۆیدا هێنا و فراکسیۆنەکانی یەکگرتوو و کۆمەڵی دادگەری و نەوەی نوێ و بەشێکی پەرلەمانتارانی فراکسیۆنی گۆڕان و بەشێکی پەرلەمانتارە سەربەخۆکان رەتیان کردەوە، فراکسیۆنەکانی یەکگرتوو و کۆمەڵیش بایکۆتی دانیشتنەکەیان کرد.

فراکسیۆن و پەرلەمانتارە ناڕەزاییەکان جەخت لەوە دەکەنەوە، درێژکردنەوەی تەمەنی پەرلەمان نایاساییە و پێویستە هەڵبژاردن ئەنجام بدرێت، ئەو فراکسیۆنانەشی دەنگیان پێداوە باس لەوە دەکەن، وەک عورفێک تەمەنی پەرلەمان درێژ دەکەنەوە.