بەپێی هەواڵی کوردپرێس، جووڵانه‌وه‌ى نه‌وه‌ى نوێ له ‌ڕاگه‌یه‌نراوێكدا ئاشكرای كردووه‌، بڕیاربوو ئەمڕۆ چوارشەممە هیمداد شاهین لەبری شاسوار عەبدولواحید سەرۆکی جووڵانەوەکە بەشداریی کۆبوونەوەی لایەنەکان بکات لە سەرۆکایەتیی هەرێم.

له‌و ڕووه‌شه‌وه‌ ده‌ڵێت: "بەڵام بەهۆی دۆخی ئەم هەفتەیە و زیندانی کردنی سەدان هاوڵاتی ‌و بەشی زۆری ئەندامانی ئەنجومەنی باڵای نەوەی نوێ ‌و چەندین خۆبەخشی جووڵانەوەکە، بریاڕمان دا بەشداریی کۆبوونەوەکە نەکەین".

هه‌ڵوێستى جووڵانه‌وه‌كه‌شى له‌باره‌ى پرسى هه‌ڵبژاردنه‌وه‌ ڕوون كردۆته‌وه‌ و ڕایگه‌یاندووه‌: "سەرباری ئەوەش پێمان وایە هەڵبژاردن ڕێگایەکی گرنگە بۆ گۆڕینی ئەم دەسەڵاتە و باشتر کردنی دۆخی خەڵک، بۆیە بە هەموو شێوەیەک پشتیوانیی لە ئەنجامدانی هەڵبژاردنێکی پاک‌ و بێگەرد دەکەین لە نزیکترین کاتدا و بە سەرپەرشتیی نەتەوەیەکگرتووەکان ‌و کۆمسیۆنێکی پاک‌ و بێلایەن".

له‌كۆتاییشدا ڕایگه‌یاندووه‌، "بۆیە جگە لەو خاڵە، هیچ وردەکاریەکی تر لای نەوەی نوێ هێندە گرنگ نییە بەقەد ئەنجامدانی هەڵبژاردن ‌و کۆمسیۆنێکی بێلایەن".

شایانی باسە له‌کاتژمێر 11ی پێشنیوەڕۆى ئه‌مڕۆ لەبیناى سەرۆکایەتی ھەرێم، بەئامادەبونی جنین بلاسخارت نێردەی تایبەتی سکرتێری گشتیی نەتەوەیەکگرتوەکان لەعێراق، لایەنەکانی هەرێم لەبارەی ئەنجامدانی هەڵبژاردن له ‌كۆبوونه‌وه‌دان.