بەپێی هەواڵی کوردپرێس، هێڤیدار ئەحمەد، جێگری سەرۆکی لیژنەی دارایی لە پەرلەمانی کوردستان ڕایگەیاند: "بەگوێرەی ڕاپۆرتی سێیەمی چاکسازی، 984 کەس کرابوونە شەهید کە شەهید نەبوون، 274 کەسیان لە هەولێر بوون، 618 کەسیان لە سلێمانی و 119 کەسیشیان لە دهۆک بوون".

ناوبراو ئاماژەی بەوەش کردووە، "هەروەها 27 هەزار و 834 کەس ناوییان وەک کەمئەندام نووسراوە و مووچەیان وەرگرتووە و کەم ئەندام نەبوون".

هێڤیدار ئەحمەد ئەوەشی خستووەتەڕوو، "هەروەها چوار هەزار و 189 کەس دوو مووچەیان وەرگرتووە، هەبووە دوو مووچەی خانەنشینی وەرگرتووە، هەیە فەرمانبەرە و خانەنشینە، هەشە دوو مووچەی فەرمانبەری هەیە".

هەر بەگوێرەی ڕاپۆرتەکەی چاکسازی، " 154 کەس بەناوی بریکاری وەزیر و پارێزگار و جێگری پارێزگار و بەڕێوەبەری گشتی و قائیمقام و بەڕێوەبەری ناحییە، مووچە وەردەگرن و جێگەیان نییە کاری تێدا بکەن".

بەگوێرەی ڕاپۆرتەکە، "نزیکەی 20 ملیار دینار بۆ کرێی خوێندنی منداڵانی شەهید خەرج کراوە".