هوشداریی وەزارەتی دەرەوەی سووریا لەبارەی ئەگەری هێرش کردنی تورکیا: بەرگری لە خۆمان دەکەین
پوختەی هەواڵ
بەپێی هەواڵی کوردپرێس، ئاژانسی هەواڵی فەرمیی سووریا (سانا) راگەیێنراوێکی وەزارەتی دەرەوەی ئەو وڵاتەی بڵاوکردەوە کە تێیدا هاتووە: "کۆماری سووریای عەرەبی ئەو دوژمنکاریانە رەتدەکاتەوە کە لە چەند رۆژی رابردووەوە لە لایەن هێزە داگیرکارەکانی تورکیاوە لە هەرێم و شارەکانی باکووری رۆژهەڵاتی سووریا ئەنجامیداون کە بوونەتە هۆی گیانلەدەستدانی خەڵکی سڤیل و زیانی زۆری بەر کەرتی گشتی و سامانی تایبەت گەیاندووە و چەندین خێزان بەهۆیەوە ئاوارەبوون."
وەزارەتی دەرەوەی سووریا هاوکات هەوڵی تورکیا بۆ دروستکردنی "ناوچەی ئارام" بە "پێشێلکاریی گەورە" ناودەبات و دەڵێت: "بەشێکە لەو پاکتاوە نەتەوەیی و جوگرافییەی لە لایەن حکوومەتی رەجەب تەیب ئەردۆغانەوە لە ناوچە داگیرکراوەکان دەکرێت." دەشڵێت ئەوە "تاوانی جەنگ و تاوانی دژی مرۆڤایەتییە"
ئاژانسی سانا ئاماژەی بەوەش کردووە کە وەزارەتی دەرەوەی سووریا دەڵێت، سەروەری، سەربەخۆیی و یەکپارچەیی خاکی سووریا "نابنە کەرەستەی دەستی رژێمی تورکیای تووندڕەو تاوەکوو هەڕەشە و مامەڵەیان پێوە بکات."
بۆچوونی بەکارهێنەران