بەپێی هەواڵی کوردپرێس، ڕەجەب تەیب ئەردۆغان سەرۆکی تورکیا لەمیانی کۆنگرەیەکی ڕۆژنامەوانی هاوبەش لەگەڵ عەبدولمەجید تەبوونی هاوتا جەزائیرییەکەی ڕایگەیاند، ئەوان ڕازی نابن هەریەک لە سوید و فینلەندا ببن بە ئەندامی هاوپەیمانی باکووری ئەتڵەسیی (ناتۆ).

سەرۆکی تورکیا ڕاشیگەیاند، بەهۆی هەڵوێستی سوید و فینلەندا لەپشتیوانی کردنی ئیدارەی خۆسەری کوردی لە سووریا و داڵدەدانی ئەندامانی پەکەکە ‌و سەپاندنی سزا بەسەر تورکیادا، وڵاتەکەیان دژایەتیی ئەندامبوونی ئەو دوو وڵاتە لە هاوپەیمانی باکووری ئەتڵەسیی دەکات.

بەوتەی سەرۆکی تورکیا، سوید و فینلەندا هەڵوێستێکی ڕوون ‌و ڕاشکاویان دژ بە هێزە کوردانی کوردستانی سووریا ‌و ئەو ڕێکخراوانە نییە کە سەر بەئیدارەی خۆسەرن.

ئەردۆغان ئاماژەی بەوەش کردووە، لەبەرئەو هۆکارە لەم قۆناغەدا ناتوانن ڕازیی بن ئەو دوو وڵاتە ببنە ئەندامی ناتۆ.

ئەردۆغان هەر لەسەر هەمان بابەت وتویەتی:"پێویست ناکات شاندی سوید و فینلەندا بێنە ئەنقەرە بۆئەوەی بڕوامان پێبهێنن ڕازیی بین ببنە ئەندامی ناتۆ".