بەپێی هەواڵی کوردپرێس، گوتەبێژێکی سەربازیی هاوپەیمانیی نێودەوڵەتی دژی داعش بە ڕووداوی رایگەیاندووە: "رێککەوتی 9ـی ئایار، کەمێک بەر لە کاژێر 10:00ـی شەو، کارمەندانی بەرگریی بنکەی هاوپەیمانان لە بنکەی ئاسمانیی هەریر لە هەرێمی کوردستانی عێراق هەوڵیان دەدا کە بەرپەرچی سیستمێکی ئاسمانیی بێمرۆڤ (درۆن) بدەنەوە کە هەڕەشە بوو بۆ سەر بنکەکە و کارمەندەکان. ئاگاداری ئەو راپۆرتانەین کە بانگەشەی ئەوە دەکەن کە ئەو گولـلانەی تەقێندران وەک بەشێک لە رێکارەکانی بەرگری دژی ئەم کارە دووژمنکارییە کاریگەری کرووەتە سەر ئەو خانوو و ئۆتۆمبێلانەی کە نزیک بوون لە شوێنەکە.

ناحیەی باسرمە سەر بە قەزای شەقڵاوەی پارێزگای هەولێرە و 59 کیلۆمەتر لە ناوەندی شاری هەولێرەوە دوورە.

گوتەبێژەکەی هاوپەیمانان ئەوەشی گوتووە کە: "ئێستا کار دەکەین لەگەڵ هاوبەشەکانمان و بەڕێوەبەرایەتیی دژەتیرۆری سەر بە ئەنجوومەنی ئاسایشی هەرێمی کوردستان بۆ پەیوەندیکردن بە کوردەکانی ناوچەکە و لێکۆڵینەوە لەو راپۆرتانە. هیچ نیشانەیەک نییە کە کەس برینداربووبێت. ئێمە بەردەوام دەبین لە لێکۆڵینەوە لە رووداوەکە."

رۆژی دووشەممە و لەکاتی رووداوەکەدا، جەنگاوەر ئاژگەیی، بەڕێوەبەری ناحیەی باسرمە بە تۆڕی میدیایی رووداوی راگەیاند، هێزێکی ئەمریکی کە لە فڕۆکەخانەی هەریر جێگیرکراون، لەکاتی مەشقدا بە هەڵە تەقە بەنێو ناوەندی شارۆچکەکەدا دەکەن و گوللـە بەر 11 خانوو و ئۆتۆمبێلێک کەوتووە.