بەپێی هەواڵی کوردپرێس، دوای ئەوەی سەردانی گەرمیانیكرد، لاهور شێخ جەنگی لەبارەی سەردانەكەیەوە بڵاویكردەوە، بە مەبەستی ئاگاداربوون لە دۆخی ژیان و گوزەرانی هاووڵاتییان، سەردانی هەر دوو شاری کەلار و کفری و ناحیەی ڕزگارییان کرد.

ناوبراو دەشڵێت: هاوشێوەی شار و شارۆچکەکانی تری هەرێمی کوردستان، گوزەرانی خەڵک و دۆخی بازاڕ و کاسبکاران و فەرمانبەران لەوپەڕی خراپیدایە، گەنجانی دەڤەرەکە بێکارن، هاووڵاتییان نیگەرانن لە دەسەڵات و بێئومێد بوون، داوای گۆڕانکاری و چاکسازی ڕاستەقینە دەکەن، داوای پرۆژەی خزمەتگوزاریی دەکەن.

لەبارەی ئامانجی سەردانەكانیەوە دەڵێت: ئامانجمان لەم سەردانانەی شار و شارۆچکەکان، بۆ پشتیوانیکردنە لە خەڵکەکەی خۆمان، دەمانەوێت پێیان بڵێین کە بێئومێد نەبن، ئێمە پشتیوان و داکۆکیکارێکی سەرسەختی داوا ڕەواکانیان دەبین.

ئاماژە بەوە دەكات، كە دوای سەردانەكانی پەیامی بۆ حكوومەت و یەكێتی دەبێت و وتی: دوای ئەم سەردانانە پەیامی خۆمم دەبێت بۆ حکوومەت و حزبەکەم، چونکە بێزارای و بێ ئومێدی خەڵک گەیشتووەتە لێواری تەقینەوەی جەماوەری و خەریکە ئەزموونەکەشمان دەکەوێتە بەر مەترسی.