بەپێی هەواڵی کوردپرێس، ئه‌نجومه‌نى نوێنه‌رانی عێراق بەزۆرینەی دەنگ بڕیاریدا دووبارە دەرگای خۆپاڵاوتن بۆ پۆستی سەرۆک کۆماری عێراق بکاته‌وه‌، 265 پەرلەمانتار ئامادەی کۆبوونەوەکە بوونه‌و 203 پەرلەمانتار بە بەڵێ ‌و 62 پەرلەمانتاریش بەنەخێر بۆ کردنەوەی دەرگای خۆپاڵاوتن بۆ پۆستی سەرۆک کۆمار دەنگیانداوە.

شایانی باسە یه‌کی ئه‌م مانگه‌، دادگای فیدڕاڵی عێراق له‌باره‌ی بڕیاری دوباره‌کردنه‌وه‌ی ده‌رگای خۆپاڵاوتن له‌لایه‌ن ده‌سته‌ی سه‌رۆکایه‌تی په‌رله‌مانی عێراق کۆبووه‌وه‌ و بڕیاری دا دووباره‌کردنه‌وه‌ی ده‌رگای خۆپاڵاوتن بۆ پۆستی سه‌رۆک کۆمار ناده‌ستوریه‌، هیچ مادده‌یه‌کی ده‌ستوری و یاسایی نییه‌ که‌ ده‌سه‌ڵات بداته‌ سه‌رۆکایه‌تی ئه‌نجومه‌نی نوێنه‌ران بۆ کردنه‌وه‌ی دوباره‌ ده‌رگای خۆپاڵاوتن، به‌ڵام رایگه‌یاند، په‌رله‌مان ده‌توانێت به‌ زۆرینه‌ی ده‌نگ بڕیاری له‌سه‌ر کردنه‌وه‌ی دوباره‌ ده‌رگای خۆپاڵاوتن بدات.