کوردپرێس:

ڕۆژی شەمە 23ی ئەکتەوبری 2021 سوپای تورکیا بە فڕۆکەی بێفڕۆکەوان هێرشی کردە سەر کۆبانێ و سێ ئەندامی هێزەکانی سووریای دیموکرات لەو هێرشەدا گیانیان بەخت کرد.

بە پێی نووسراوی ئاژانسی هاوارنیوز، سەنتەری میدیایی هێزەکانی سووریای دیموکرات ڕاگەیێندراوێکی لەو بارەیەوە بڵاو کردەوە و ڕایگەیاند: سێ ئەندامی ئێمە بۆ چارەسەری پزیشکی سەردانی کۆبانێیان کردبوو ڕۆژی ڕابردوو کاتژمێر 17 و 40 خولەک لە کاتی گەڕانەوەیان لە کۆبانێ لە ناوچەی سەرین کرانە ئامانجی درۆنە بومبهاوێژەکانی سوپای داگیرکەری تورکیا. لەو هێرشەدا سێ شەڕڤانی SDF بە ناوەکانی هۆزان قامیشلۆ و گوڵی حەلەب و ئامەد عەفرین گیانیان بەخت کرد.

ئەوەش لە کاتێکدایە کە میدیاکان لە ڕووماڵ کردنی ئەو هەواڵەدا ڕۆژی ڕابردوو دەستەواژەی خەڵکی مەدەنییان بۆ قوربانییەکانی ئەو هێرشە بەکار هێنابوو.

شایانی باسە لە ماوەی 5 ڕۆژی ڕابردوودا ئەوە دووهەم هێرشی درۆنەکانی تورکیا بۆ سەر کۆبانێ بووە کە زیانی گیانیی لێکەوتەوە.