کوردپرێس:

پارتەکانی یەکێتیی نیشتمانیی کوردی سووریا (PYNK) لە بەیاننامەیێکدا ئاماژەی بە هێرشی هێزەکانی پارتی دیموکراتی کوردستان بۆ سەر پارتی کرێکارانی کوردستان (PKK) کردووە و بەکر حاج عیسا سەرۆکی لیژنەی پێوەندییە دبڵۆماسییەکانی پارتی یەکێتیی دیموکراتی (PYD) لە هەرێمی فورات خوێندرایەوە.

بە پێی نووسراوی ئاژانسی هەواڵی فورات، بەکر حاج عیسا ڕایگەیاند لە لایەن پارتەکانی یەکێتیی نیشتمانی کوردەوە داوا لە هاووڵاتییانی هەرێمی کوردستان و هێزە سیاسییەکان و بەتایبەت پەرلەمانی کوردستان دەکەین دژی شەڕی ناوخۆی کورد، بەئەرکی نیشتمانیی خۆیان هەستن و دەستپێشخەریی ئەو ڕێگرتنە بکەن.

ناوبراو گوتیشی: هەروەک چۆن خوێنی پێشمەرگەیێکیان لا گرینگە بەهام شێوەش دڵۆپێک خوێنی گەریلاشیان لا گرینگ و بەبایەخ بێت.

حاج عیسا زیادی کرد: ئێمە دەبینین ئەگەر شەڕێک لە کوردستانی عێراق ڕوو بدات نەک هەر بە قازانجی دەوڵەتی تورکیا و هاوپەیمانەکانیەتی بەڵکوو بە هیچ شێوەیێک قازانجی کوردی تێدا نابێت.

ناوبراو داوای لە نێچیرڤان بارزانی سەرۆکی هەرێمی کوردستانیش کرد کە قورساییی نیشتمانیی خۆی بسەلمێنێت. چوونکە ئەم شەڕە لە بەرژەوەندیی کورد نیە دەستکەوتی کورد دەخاتە مەترسییەوە.