بەپێی هەواڵی کوردپرێس، مەکتەبی سیاسیی یەکێتیی نیشتمانیی کوردستان سەرکۆنەی بۆردوومانی فڕۆکەکانی تورکیا لە سنووری گوندی سەیدانی سەر بە شارۆچکەی قەرەهەنجیر لە سنووری قەزای چەمچەماڵ دەکات و داوای "دەستبەجێ راگرتن"ـیان دەکات.

لە راگەیێندراوەکەی مەکتەبی سیاسیی یەکێتیدا هاتووە، "مەکتەبی سیاسیی یەکێتی نیشتمانیی کوردستان ئیدانەی بۆردوومانی فڕۆکەکانی سوپای تورکیا بۆ سنووری قەرەهەنجیر لە نزیک شاری کەرکووک دەکات کە قوربانی و زیانی لێکەوتووەتەوە. ئەم سنوور بەزاندنە پێشهاتێکی خراپە کە ناوجەرگە و قووڵایی کوردستان و عێراقی گرتووەتەوە، بۆیە داوای دەستبەجێ راگرتنی دەکەین، چوونکە هیچ پاساوێک نابێت ببێتە ھۆی سنوور بەزاندن و زیانگەیاندن بە خەڵکی بێتاوان."

مەکتەبی سیاسیی یەکێتی داواش لە حکوومەتی عێراق دەکات کە: "ئەرکی دەستووری و نیشتمانیی خۆی لە داکۆکی کردن لە خاکی عێراق بە کوردستانیشەوە راپەڕێنێت و لە رێگەی کەناڵە دیپلۆماسییەکانەوە حکوومەتی تورکیا لەم پێشێلکارییە ئاگادار بکاتەوە."

شایانی باسە ئێوارەی ئەمڕۆ بۆ جاری دووەم لەم هەفتەیەدا تورکیا بۆردوومانی گوندی سەیدانی کرد.