بەپێی هەواڵی کوردپرێس، دیندار زێباری، رێکخەری راسپاردە نێودەوڵەتییەکان لە حکوومەتی هەرێمی كوردستان، لە بەیاننامەیەکدا رایگەیاند، شەڕ و پێکدادانەكانی نێوان پەكەكە و سوپای توركیا لە سنوورەكانی هەرێمی كوردستان بووەتە هۆی ئاوارەبوونی سەدان هاووڵاتی و زیان گەیاندن بە گیان و موڵک و ماڵیان.

ناوبراو ئاشکراشی کرد، لە سەرەتای ئەمساڵەوە تا مانگی ئاب، 165 هێرشی ئاسمانی، و 274 گولـلەتۆپ، و شەش هێرشی سەرزەمینی ئەنجامدراون كە بەھۆیەوە زیاتر لە 800 گوند چۆڵ کراون و بێ خزمەتگوزاری ماونەتەوە.

دیندار زێباری، ئاماژەی بەوەشدا، هیچ لایەنێکی نیشتمانی و نێودەوڵەتی دەستپێشخەر نەبوونە بۆ گەیشتن بە دەرئەنجامێک، بۆ قەرەبوو کردنەوەی ئەو هاووڵاتییانەی کە موڵک و ماڵیان وێران بووە و ژیانیان لە مەترسی دابووە.

رێکخەری راسپاردە نێودەوڵەتییەکان داوا دەكات، کۆتایی بە گرژیی و ئاڵۆزییەکان لە ناوچە سنورییەکان بهێندرێت.