بەپێی هەواڵی کوردپرێس، وه‌زاره‌تی ده‌ره‌وه‌ی عێراق، له‌ راگه‌یه‌ندراوێکدا ئاشکرای کرد، فوئاد حوسێن، وه‌زیری ده‌ره‌وه‌ له‌گه‌ڵ عه‌باس عراقچی، وه‌زیری ده‌ره‌وه‌ی ئێران، دوایین پێشهاته‌کانی ڕه‌وتی دانوستانه‌کانی نێوان تاران و واشنتۆنیان تاوتوێ کردوه‌ له‌گه‌ڵ ئه‌و په‌ره‌سه‌ندنانه‌ی که‌ په‌یوه‌ستن به‌و دۆسیه‌یه‌ له‌ ناوچه‌که‌.

هه‌ردوولا باسیان له‌ به‌رده‌وامیی دانوستانه‌کان کردوه‌ که‌ ڕۆژی پێنجشه‌ممه‌ی داهاتوو دیاریکراوه‌ بۆ گه‌ڕێکی دیکه‌ی دانوستان له‌نێوان تاران و واشنتۆن له‌ جنێڤ.

هه‌ر له‌ په‌یوه‌ندییه‌ ته‌له‌فۆنییه‌که‌دا، وه‌زیرانی ده‌ره‌وه‌ی عێراق و ئێران باسیان له‌ کۆکردنه‌وه‌ی هێزی سه‌ربازیی زیاتر له‌ ناوچه‌که‌ کردوه ‌و جه‌ختیان له‌وه‌ کردۆته‌وه‌ که‌ ڕێگه‌ی ڕاست بۆ چاره‌سه‌رکردنی ئاڵه‌نگارییه‌کانی ئێستا خۆی له‌وه‌دا ده‌بینێته‌وه‌ که‌ ڕه‌چاو رێبازێکی ئاشتیانه‌ بکرێت و په‌ناببرێته‌ به‌ر گفتوگۆ و دانوستان وه‌ک ڕێگه‌یه‌ک بۆ که‌مکردنه‌وه‌ی گرژییه‌کان و به‌هێزکردنی سه‌قامگیری.

وه‌ک له‌ ڕاگه‌یه‌ندراوه‌که‌دا هاتووه‌، هه‌ردوولا هاوڕابوون له‌سه‌ر به‌رده‌وامیی په‌یوه‌ندی و هه‌ماهه‌نگییه‌کان له‌ماوه‌ی داهاتوودا بۆ گۆڕینه‌وه‌ی بیروڕکانانیان له‌باره‌ی ئه‌و پرسانه‌ی جێی بایه‌خی هاوبه‌شن به‌تایبه‌ت له‌سایه‌ی ئه‌و دۆخه‌ هه‌ستیاره‌ی که‌ ناوچه‌که‌ به‌خۆیه‌وه‌ ده‌یبنێت.