بەپێی هەواڵی کوردپرێس، یاشار گولەر، وەزیری بەرگریی تورکیا لەگەڵ ژمارەیەک فەرماندەی باڵای سوپای تورکیا سەردانی فەرماندەیی لیوای ۱۲ی کۆماندۆی لە شاری عوسمانییە کرد و لەبارەی پرۆسەی چارەسەری و دوایین پێشهاتەکانی سووریا و ڕۆژئاوای کوردستان قسەی کرد.

یاشار گولەر داوای لە هێزەکانی سووریای دیموکرات (SDF) کرد کە پابەندی ڕێککەوتنەکانی لەگەڵ حکوومەتی سووریا بێت و ڕایگەیاند: "بۆ ئاسایشی سنوورەکانمان، و هەروەها بۆ سەقامگیریی هەمیشەیی و یەکپارچەیی سیاسیی سووریا، دەبێ هێزەکانی یەپەگە-هەسەدە داواکارییەکانی رێککەوتنەکانی ۱۰ی ئادار و ۱۸ی کانوونی دووەم بەپەلە جێبەجێ بکەن".

یاشار گولەر وتیشی: سەبارەت بە جێبەجێکردنی رێککەوتنەکان لەگەڵ هەسەدە، لەگەڵ حکوومەتی سووریا لە هاوئاهەنگیی نزیکدان.

وەزیری بەرگریی تورکیا ئاماژەی بە پرۆسەی چارەسەری لە تورکیا کرد و گوتی: "ئەم پڕۆژە مێژووییە، بە هەوڵەکانی سوپاکەمان لە گۆڕەپان و بە دیدگای دەوڵەتیی ژیرانە بەڕێوەدەبردرێ. بۆ سەرکەوتنی ئەم پرۆسەیە، دەبێ پەکەکە و گرووپەکانی سەر بە پەکەکە، بەتایبەتی لە سووریا، کۆتایی بە چالاکییەکانیان بهێنن و بە زووترین کات بەبێ مەرج چەکەکانیان دابنێن".

گولەر سەبارەت بە ئۆپەراسیۆنە سەربازییەکانی دەرەوەی سنووری تورکیا وتی: "تاوەکو بە تەواوی دڵنیا نەبینەوە کە رێکخراوی تیرۆر لەسەر وڵاتەکەمان نابێتە هەڕەشە و تاوەکوو نەگەینە ئاستی پێویست لە ئاسایش، لە چالاکییەکانمان کە پلانیان بۆ دانراوە، بەبێ وەستان بەردەوام دەبین".