بەپێی هەواڵی کوردپرێس، بەگوێرەی ڕاگەیێندراوی رێکخراوی تیمەکانی دروستکەری ئاشتی کۆمەڵگە (CPT)ـی ئەمریکی، کە ئەمڕۆ پێنجشەممە بڵاوکراوەتەوە، "سوپای تورکیا لە مانگی ئاداردا، ۱۱۸ هێرش و بۆردوومانی بۆ سەر هەرێمی کوردستان ئەنجام داوە".
 
کامەران عوسمان، ئەندامی تیمی کوردستانیی رێکخراوەکە دەڵێت: "هێرشەکانی سوپای تورکیا لە مانگی ئاداردا، بەراورد بە مانگی کانوونی دووەم، ۱۲% و بەراورد بە مانگی شووبات، ۲۱% کەمیان کردووە".
 
لە راگەیێندراوەکەدا هاتووە: "لە هەفتەی یەکەمی دوای ڕاگەیاندنی بانگەوازی ئاشتی، لەلایەن عەبدوڵڵا ئۆجەلان، رێبەری دەستگیرکراوی پەکەکە، رێژەی بۆردوومانەکان بەراورد بە دوایین هەفتەی پێش ڕاگەیاندنی بانگەوازەکە، ۱۴۵% زیادی کردووە".
 
بەگوێرەی ئاماری ڕێکخراوەکە، لە مانگی ئاداردا، سوپای تورکیا ۵۵ هێرشی بۆ سەر سنووری پارێزگای هەولێر و ۵۱ هێرشی بۆ سەر سنووری پارێزگای دهۆک و ۱۲ هێرشیشی بۆ سەر سنووری پارێزگای سلێمانی کردووە.
 
کامەران عوسمان دەشڵێت، لە مانگی ئاداردا سوپای تورکیا هیچ بۆردوومانێکی سنووری مەخموور و شنگالی نەکردووە.
 
ڕێکخراوی سی پی تیی ئەمریکی لە راپۆرتەکەیدا ئاماژەی بەوەشکردووە، لە سێ مانگی ئەم ساڵدا تورکیا ۴۰۴ هێرش و بۆردوومانی بۆ سەر هەرێمی کوردستان کردووە و بەهۆیانەوە دوو هاونیشتمانی سڤیل شەهیدبوون و چواری دیکەش بریندار بوون.