بەپێی هەواڵی کوردپرێس، عەمار حەکیم، سەرۆکى هاوپەیمانیى هێزەکانى دەوڵەتى نیشتمانی دەڵێت: "گەلێک خزمەتیان نەکەین شایستەى ئەوە نابین نوێنەرایەتییان بکەین، هەر کەسێک خۆى یان گرووپەکەى بە گەورەتر لە گەلەکەى بزانێت لە ئێمە نییە، ئێمە پێویستمان بە نوێنەرانێکە کە خەمى خەڵک هەڵبگرن بەر لە خەمى خۆیان".

سەرۆکى رەوتى حیکمە داواى لە کۆمەڵگەى نێودەوڵەتى کرد دۆخى هەستیارى عێراق لە بەرچاو بگرن و هەڵاوێردى بکەن لە پرسى هاوردەکردنى گاز و کارەبا لە وڵاتانى دراوسێوە، تاوەکوو ئەو کاتەى پڕۆژەکانى بۆ دابین کردنى ئەو پێویستیانە دەکەونە کار.

 ئەو دەرفەتەى کە ئەمریکا دابووى بە عێراق بۆ هاودەکردنى کارەبا لە کۆمارى ئیسلامىی ئێرانەوە کۆتایی هات، واشنتن کۆتوبەندى لەسەر هاودەکردنى گازیش داناوە لەو وڵاتەوە، لەکاتێکدا عێراق بۆ بەرهەمهێنانى وزەى کارەبا پێویستییەتى.

لەبارەى دۆخى ناوچەکە، سەرۆکى رەوتى حیکمە وتى: "هەڵگیرسانى جەنگێکى سەرتاسەرى لەم  ناوچەیە دەرهاویشتەکانى تەنیا لەسەر وڵاتانى ناکۆک نابێت، ئەگەر رێگە بدرێت ئاگرەکە تەشەنە بسەنێت، عێراق و وڵاتانى دراوسێى لە نێوەڕاستى گەردەلوولەکە دەبن".