بەپێی هەواڵی کوردپرێس، تامی برووس لە کۆنفرانسێکی ڕۆژنامەوانیدا ڕایگەیاند، کردنەوەی کونسوڵخانەی نوێی ئەمریکا لە هەولێر، کە گەورەترین کونسوڵخانەیە لە ئاستی ناوچەکە، دەرخەری پابەندییەکانی ئەمریکایە بەرامبەر حکوومەتی ھەرێمی کوردستان.

ناوبراو گوتیشی: کونسوڵخانەی نوێمان لە ھەولێر ھاوبەشی و ھەماھەنگی دیپلۆماتیمان لەگەڵ حکوومەتی ھەرێمی کوردستان و حکوومەتی عێراق بەھێزتر دەکات، لە چوارچێوەی کارە لە پێشینەکان و ئاڵنگارییەکان و ڕووبەڕووبوونەوەی توندڕەویی و بەھێزکردنی ئاشتی دوور مەودا.

تامی برووس لەبارەی یەکگرتن و یەکخستنەوەی ھێزی پێشمەرگەی هەرێمی کوردستان، گوتی: پێشنیاز دەکەم ئەم پرسیارە لە حکوومەتی ھەرێمی کوردستان بکەن، چوونکە بابەتێکی ناوخۆییە.

لە بارەی پێکهێنانی کابینەی دەیەمی حکوومەتی هەرێمی کوردستانیش، وتەبێژی وەزارەتی دەرەوەی ئەمریکا گوتی: بۆ پێکھێنانی کابینەی نوێی حکوومەتی هەرێمی کوردستان ئێمە ھانی ھەموو لایەنەکانمان داوە بۆ ئەوەی هەرچی زووە حکوومەتی داھاتوو پێکبھێنن.

تامی برووس هەروەها جەختی کردەوە، ھەبوونی حکوومەتێکی بەھێز و خۆڕاگر و دیموکرات، وەک زۆرجار باسمان لێوەکردووە، پێویستە بۆ پاراستنی سەقامگیری و ئاسایشی عێراق، بۆیە ھانیان دەدەین پەلە بکەن لە پێکهێنانی کابینەی نوێی حکوومەت.  

ناوبراو وتیشی پێکهێنانی حکوومەتێکی خۆڕاگر لە هەرێمی کوردستان لە بەرژەوەندی ئاسایشی ناوچەکەیە و خوازیارین هەنگاوەکانی ڕاگه‌یاندنی حكوومه‌تی نوێی هەرێم هه‌نگاوێكی ئه‌رێنی بن.

وتەبێژی وه‌زاره‌تی ده‌ره‌وه‌ی ئه‌مریكا هەروەها گوتی: هانی هەموو لایەنەکان دەدەین بۆ ئەوەی هەرچی زووە کابینەی نوێی حکوومەتی هەرێمی کوردستان پێکبهێنرێت.