بەپێی هەواڵی کوردپرێس، لاهوور شێخ جەنگی لەبارەی ناوەڕۆکی کۆبوونەوەکە ئاشکرای کرد کە لەو دانیشتنەدا جەخت کراوەتەوە لە پێویستیی گۆڕانکاریی لە عێراق و هەرێمی کوردستان لەسەر ئەو بنەمایەی کە پایەکانی حکومڕانی بەهێز بکرێت و دەستی دەرەکی دوور بخرێتەوە کە بووەتە ڕێگر لە بەردەم پێشکەوتن و گەشەکردنی وڵات.

هەروەها پێویستە چیدیکە ململانێ سیاسیەکان تێکەڵ بە مووچەی مووچەخۆرانی هەرێمی کوردستان نەکرێت، هەولێر و بەغداد بیر لە چارەسەری ڕیشەیی کێشەکان بکەنەوە کە ساڵانێکی زۆرە هاووڵاتیان باجەکەی دەدەن.

سەبارەت بە پێکهێنانی کابینەی دەیەمی حکوومەتی هەرێمی کوردستان لاهوور شێخ جەنگی وتی، لەگەڵ ئه‌ندرۆ بيزڵى جەختیان کردووەتەوە حکوومەتێکی کارا و بەهێز و خزمەتگوزار پێکبهێنرێت کە ڕەنگدانەوەی خواست و داواکارییەکانی خەڵک بێت، نەک لەسەر بنەمای دوو زۆن و دوو حزب پێکبهێنرێت.

دۆخی گشتی هەرێمی کوردستان، عێراق، پرسی گۆڕانكاریه‌كانی ناوچەکە، پێکهێنانی حکوومەت و کێشەکانی نێوان هەولێر و بەغدا بەتایبەت کێشەی مووچە بەشێکی دیکە لە تەوەرەکانی کۆبوونەوەکە بوون.