بەپێی هەواڵی کوردپرێس، سەلاحەدین بەهائەدین، ئەمینداری گشتیی یەکگرتووی ئیسلامیی کوردستان لە پەیامێکدا بە بۆنەی ڕێککەوتنی مەزڵووم عەبدی، فەرماندەی گشتیی هێزەکانی سووریای دیموکرات و ئەحمەد شەرع، سەرۆککۆماری سووریا بۆ قۆناخی راگوزەر، ڕایگەیاند: "دیدار و رێککەوتنی بەڕێزان ئەحمەد شەرع و مەزڵووم عەبدی لەسەر چەندین خاڵی بایەخداری هەردوولا، کارێکی گرنگە لە تەوقیتەکەی و لە ناوەڕۆکیدا، بەتایبەت پاش شەڕێکی خوێناوی هات، لە ئەنجامی پێکدادانی دەوڵەت و چەکدارانی پاشماوەی رژێم، کە دەرگای کردەوە لەسەر ئەگەری پشێوی و شەڕی پێکهاتەکان، بۆیە هەمیشە شەڕ خێری تێدا نییە و مێزی گفتوگۆ چارەسەر بەرهەم دێنێ."

سەلاحەدین بەهائدین هەروەها ڕایگەیاند: "لێرەدا هەنگاوی دیدار و واژۆی رێککەوتن لەنێوان دەوڵەت و هەسەدە رێگە راستەکەیە، بە هیوای بەردەوامی و زاڵکردنی زمانی گفتوگۆ و ئاشتی. سەرکەوتووبێ خەباتی دابین کردنی ماف و پێکەوە ژیانی سەرجەم پێکهاتەکان لە سووریای نوێدا".