هۆشداریی حکوومەتی بەریتانیا بۆ کۆچبەرانی کورد

پوختەی هەواڵ

حکوومەتی بەریتانیا لە پێگەی فەرمی خۆی بەزمانی کوردی هۆشداریی داوەتە کۆچبەرانی نایاسایی و دەڵێت: ئەوەی قاچاخچییەکان پێتان دەڵێن، دوورن لە ڕاستی.

بەپێی هەواڵی کوردپرێس، حکوومەتی بەریتانیا لەو هۆشدارییەدا کۆچبەرانی کورد بەزمانی کوردی ئاگەدار دەکاتەوە و دەڵێت: ئەوەی قاچاخچییەکان پێت دەڵێن کۆچی نایاسایی بۆ بەریتانیا کارێکە مەترسیی نییە و ئاسانە و دەتوانیت لێرە ژیانێکی خۆش بۆخۆت دابین بکەیت، ئەم قسەیە زۆر لە ڕاستی دوورە.

حکوومەتی بەریتانیا دەشڵێت: کۆچی نایاسایی بۆ بەریتانیا گەلێک تێچوونی هەیە، تەنانەت لەوانەیە گیانیشت تێدا بچێت، گەلێک ژن و پیاو و منداڵ مردوون کاتێک هەوڵیان داوە لەڕێگەی بەلەمی بچووک یان خۆشاردنەوە بێنە بەریتانیا.

بەریتانیا وەک هۆشداریی بە کۆچبەرانی نایاسایی ڕاگەیاندووە، ئەگەر بە نایاسایی بێنە بەریتانیا، دەکرێ دەستگیر بکرێن و دەربکرێن، ئەمانە ئەو شتانەن کە پێویستە وەک کۆچبەر بیزانی سەبارەت بە یاساکانی کۆچ لە بەریتانیا.