بەپێی هەواڵی کوردپرێس، عەممار حەکیم، سەرۆکی ڕەوتی حیکمە لە کۆنفرانسێکی ڕۆژنامەوانیدا لەگەڵ پارێزگاری هەڵەبجە کە بۆ چوارەمجارە سەردانی هەڵەبجە دەکات گوتی: "ئەمڕۆ بۆ سێیەمجار یاخود چوارەمجارە سەردانی هەڵەبجە دەکەین، هەرچەندە ئەمە دووەم سەردانمە بۆ ئەم مۆنۆمێنتە، خۆشحاڵ بووین بەم سەردانە بۆ دەرخستنی ڕێز و خۆشەویستی و شانازیمان بە ئێوە و بەو قوربانییانەی داوتانە".

ناوبراو وتیشى: "بڕوام وایە باشترین رێزلێنان بۆ هەڵەبجەییەکان دەنگدانی ئەنجوومەنی نوێنەرانە لەسەر بەپارێزگابوونی هەڵەبجە وەکوو پارێزگایەکی سەربەخۆی عێراقی، چوونکە ئەو بڕیارە خێر و خۆشی زۆر بۆ پارێزگاکە بەدی دەهێنێت و دەبێتە قەرەبوویەک بۆ ئەو تاوانە قێزەونەی ڕژێمی پێشووی سەدام لە بەرامبەریان ئەنجامی دا".

ڕۆژی سێشەممە، عەممار حەکیم، سەرۆکى ڕەوتى حیکمەى نیشتمانى گەیشتە شاری سلێمانی و لەگەڵ بافڵ جەلال تاڵەبانی، سەرۆکی یەکێتیی نیشتمانیی کوردستان کۆ بووەوە و سەردانی مەزاری مام جەلالی کرد.