بەپێی هەواڵی کوردپرێس، کۆبوونەوەکەی مەکتەبی سیاسیی پارتی دیموکراتی کوردستان و یەکێتیی نیشتمانیی کوردستان رۆژی سێشەممە 17-12-2024، لە پیرمام لە پارێزگای هەولێر بەڕێوەچوو. هۆشیار زێباری، سەرۆکایەتیی شاندی پارتی و قوباد تاڵەبانی، سەرۆکایەتیی شاندی یەکێتی دەکرد.

لە دوای کۆبوونەوەکە هەردوو حیزب ڕاگەیێندراوێکی هاوبەشیان بڵاو کردەوە و ڕایانگەیاند: "لە کۆبوونەوەکەدا بارودۆخی ناوچەکە و ئەو گۆڕانکارییانەی هاتوونەتە ئاراوە و کاریگەرییەکانیان لەسەر عێراق و هەرێمی کوردستان باسیان لێکراوە و هەردوولا کۆک بوون لەسەر تەبایی و هاوهەڵوێستی لە پاراستنی بەرژەوەندییە باڵاکانی هەرێمی کوردستان لەم قۆناخە هەستیارەدا".

بابەتێکی دیکەی نێو کۆبوونەوەکە پێکهێنانی کابینەی نوێی حکوومەتی هەرێمی کوردستان بووە. لە ڕاگەیێندراوەکەدا هاتووە: "هەردوولا هاوڕابوون بە زووترین کات لەسەر ئامادەکاری کردنی بەرنامەیەکی هاوبەش بۆ دروست کردنی بنەمایەک بۆ حکوومەتی داهاتووی هەرێمی کوردستان".

 لە راگەیێندراوەکەی ئەنجامنامەی کۆبوونەوەکەی پارتی و یەکێتی دا ئاماژە بەوە کراوە، بڕیاریاندا لیژنەیەکی هاوبەش پێکبهێنن بۆ ئامادەکاری بۆ کۆبوونەوەی داهاتوو.