موراد قەرەیلان بۆ کەناڵی ستێرک تیڤی دەڵێت، ئەو هێزانەی ئارەزووی ئاوەدانکردنەوەی سووریایان هەیە ناسەقامگیرن، تورکیا ئاشتی و سەقامگیری بۆ سووریا ناخوازێت، بۆیە ئەوەی تورکیا بۆ سووریا دەیەوێت ڕوونادات و تورکیا نزیک دەبێتەوە لە جوولانی بۆ ئەوەی خۆی بسەپێنێت و تورکیا گەورەترین مەترسییە بۆ سەر سوریا.

قەرەیلان هەروەها وتیشی: سەردەمێکی نوێ لە سووریا و ڕۆژهەڵاتی ناوەڕاست بە گشتی دەست پێدەکات و تورکیا دەستکەوتەکانی کورد وەک هەڕەشەیەک بۆ سەری دەبینێت، بۆیە تورکیا نایەوێت کورد بەشداری پڕۆسەی بنیاتنانی سووریای نوێ بکات، پێویستیشە کورد لەم قۆناغەدا یەکبگرن و هاوکار بن.

 ئەندامی کۆمیتەی بەڕێوەبەری PKK دەشڵێت: تورکیا دەیەوێت لە ڕێگەی بەکرێگیراوەکانییەوە هێرش بکاتە سەر ئیدارەی خۆسەر و ئامانجی تورکیا قووڵکردنەوەی شەڕی سووریایە.

ناوبراو ڕاشیگەیاند، ئیدارەی خۆسەر ڕۆڵێکی گرنگ دەگێڕێت لە بنیاتنانی سووریایەکی نوێدا، پێویستە گەلەکەمان لەم قۆناغەدا گوند و شارەکانی خۆی بەجێ نەهێڵێت و خەڵکی باکوور و ڕۆژهەڵاتی سووریا خواستی خۆیان بۆ خۆڕاگری دەربڕی، پێویستە گەلەکەمان بەپێی دەرفەت و مەترسییەکانی بەردەست خۆی ئامادە بکات.