سەرەڕای زیاد بوونی بەرهەمهێنان لە هەرێمی کوردستان، قەزانجمان کەمی کردووە

پوختەی هەواڵ

کۆمپانیای دانەغاز ڕایگەیاند، لە هەرێمی کوردستان – عێراق %۳ی بەرهەمیان زیادی کردووە، لە بەرانبەردا قازانجیان کەمی کردووە.

بەپێی هەواڵی کوردپرێس، کۆمپانیای دانەغاز کە لە چەند کێڵگەیەکی غازی هەرێمی کوردستان کار دەکات، بەرهەمی ئەمساڵی بڵاو کردووتەوە و ڕایگەیاند: " %۳ بەرهەمیان لە هەرێم زیادی کردووە، هەروەها بەرهەمهێنانی نەوتیان بۆ ۳۸ هەزار و ۲۰۰ بەرمیل نەوت لە ڕۆژێکدا زیاد کردووە".

دانەغاز باس لەوەش دەکات، "بەراورد بە نۆ مانگی ساڵی ڕابردوو قازانجیان %۱۱ کەم بووەتەوە و دابەزیوە بۆ ۱۱۲ ملیۆن دۆلار".

دانەغاز پلانی هەیە لەگەڵ کۆمپانیا پێرڵ پترۆلیۆم دەست بەدروستکردنی کێڵگەیەکی دیکەی غاز لە کۆرمۆری سنووری چەمچەماڵ بکەن.

دانە غاز لە كوردستان و میسر بەرهەمی هەیە، لە میسر بە ڕێژەی ۲۴% بەرهەمی كەمی كردووە و گەیشتووە ۱۷ هەزار و ۱۰۰ بەرمیل لە ڕۆژێكدا. بەڵام لە هەرێمی کوردستان بەرهەمی زیادی کردووە بە ڕێژەی %۳.