بەپێی هەواڵی کوردپرێس، هاوڕێ تۆفیق، بەرێوەبەری بەشی پەیوەندییەکانی سەرۆکایەتیی کۆماری بە زەمەن پرێسی وتووە: "دوای پێشوازییە پرۆتۆکۆلییەکە، هەردوو سەرۆک کۆمار دووقۆڵی نزیکەی نیو کاتژمێر کۆ بوونەوە، دوای کۆبوونەوەکە لە سەرۆک کۆمارم پرسی بە چ زمانێک قسەتان کرد؟ وتی: بە کوردییەکی شیرین، خۆیشم بە زمانی کوردی پێشوازیم لێکرد و پزیشکیان بە شێوەزاری موکریانی زۆر رەوان وەڵامی دامەوە".

لەو كۆبوونەوەیەدا، سەرۆككۆماری عیراق رایگەیاند، پەیوەندییەكانیان لەگەڵ ئێران پتەو و مێژووییە و ئێران دراوسێیەكی گرنگە بۆ عیراق و پێگەی هەرێمیی گەورەی هەیە لە سەقامگیری ناوچەكە، عێراقیش پشتیوانی هەماهەنگییە هاوبەشەكان دەكات بۆ ڕووبەڕووبوونەوەی تیرۆر و توندڕەوی و دابین كردنی ئاسایشی سنوورەكان و كۆتاییهێنان بە ئاڵۆزییەكانی ناوچەكە. جەختیشی كردەوە لە كاراكردنی رێككەوتن و یاداشتەكانی نێوانیان، داواشی كرد ئاوی سنورە هاوبەشاكانیان بەربدرێتەوە و بگەنە لێكتێگەیشتن سەبارەت بە دابەشكردنی ئاو.

لای خۆشیەوە، پزیشكیان داوای پێكهێنانی لیژنەیەكی هاوبەشی كرد لە بوارەكانی تەندروستی و ژینگە و پیشەسازی و ئاسایش و گەشتیاری، كە هەرێمی كوردستانیش بگرێتەوە.