بەپێی هەواڵی کوردپرێس، فوئاد حسێن، وەزیری دەرەوەی عێراق ئەمڕۆ سێشەممە لە كۆنگرەیەكی ڕۆژنامەوانیدا له‌ به‌غدا ڕایگەیاند،  گفتوگۆكان سەبارەت بە كشانەوەی هێزەكانی هاوپەیمانی نێودەوڵەتی لە خاكی عێراق بەردەوامن و گرژییەکانی ناوچەکەش دیاری کردنی کاتی کشانەوەی هێزەکانی هاوپەیمانانی دواخست.

ئاماژەی بەوەش كرد، عێراق توانیویەتی ئەمریكا ڕازی بكات بەوەی وڵامی هێرشەكەی سەر بنكەی عەین ئەسەد نەداتەوە و لە ماوەی ساڵێكدا بارودۆخی ناوچەكە گۆڕاوە.

فوئاد حسێن باسی لەوەش كرد، عێراق وڵاتی ئێرانی ئاگاداركردوەتەوە كە هێرشكردنە سەر هەرێمی كوردستان كارێكی هەڵەیە و لە ڕابردوودا ئەو وڵاتە لەسەر بنەمای زانیاری هەڵە هێرشی كردوەتە سەر كوردستان.

ئەوەشیخستەڕوو، عێراق لە پەیوەندایە لەگەڵ وڵاتانی دیكە بەمەبەستی ئارامكردنەوەی بارودۆخی كەرتی غەززە و تا ئێستا هەوڵەكان نەگەیشتونەتە ئەنجام بۆ گەیشتن بە ئاگربەست، ناوچەكەش لە ژێر مەترسی و هەڕەشەدایە.

سەبارەت بە پارتی كرێكارانی كوردستان (په‌كه‌كه‌) فوئاد حسێن وتی، "ناتوانرێت هێز بەكاربهێندرێت بۆ مامەڵه‌كردن لەگەڵ ئەو پارتە و پێویستە سوپای توركیا لە قۆناغێكی دیاریكراودا لە خاكی عێراق بكشێتەوە، بوونی پەكەكە كێشەیە بۆ عێراق".

ڕوونیكردەوە، "ئێمە لە ناوخۆ و دەرەوەدا هەنگاو دەنێین بۆ ئەوەی عێراق نەخەینە بارودۆخێكی شەرمەزاركەرەوە و ڕاكێشانی عێراق بۆناو شەڕ مەترسیدارە و نابێت كۆمەڵگە و حكوومەتی عێراق بكەونە دۆخی كار و كاردانەوە".

وه‌زیری ده‌ره‌وه‌ی عێراق ئەوەشی باسكرد، حكومەت و پەڕلەمانی عێراق مافی خۆیانە بڕیار لەسەر شەڕ و ئاشتی بدەن، هەروەها نەگەیشتونەتە بڕیاری كۆتایی سەبارەت بە وادەی كشانەوەی هێزەكانی هاوپەیمانان.