لە ناوچە شاخاویەکانی سنووری ئامێدی و زاخۆ ئاگرێکی گەورە کەوتەوە/ فیلم

پوختەی هەواڵ

فڕۆکە جەنگییەکانی تورکیا دوو گوندی سنووری شارۆچکەی ئامێدییان لە پارێزگای دهۆک بۆردوومان کرد و بەهۆیەوە ئاگرێکی فراوان لە ناوچەکە کەوتووەتەوە.

بەپێی هەواڵی کوردپرێس، سەرچاوە هەرێمییەکان بە ڕۆژنیوزیان ڕاگەیاندووە: سوپای تورکیا هەردوو گوندی مێجی و بورجیان لە سنووری شارۆچکەی ئامێدی لە پارێزگای دهۆک بۆردوومان کردووە و بەهۆیەوە ئاگرێکی بەرفراوان لە ناوچە شاخاویەکان کەوتووەتەوە و تا ئێستاش ئاگرەکە لە تەشەنەدایە.

ئەو سەرچاوەیە ئاماژەی بەوەش کرد، بەهۆی بۆردوومانەکەوە و ئاگرەکەوە زیانێکی زۆر بە موڵک و ماڵی هاوڵاتییان گەیشتووە و بەهۆی سوپای تورکیاوە کەس نەیتوانیوە بچێت ئاگرەکە کۆنترۆڵ بکات.

لە ١٥ـی حوزەیرانی ٢٠٢٤، تورکیا بە نزیکەی ۱۰۰۰ سەرباز و ٣٠٠ تانک و زرێپۆشی سەربازییەوە لەشکرکێشییەکی نوێی بۆ سەر هەرێمی کوردستان دەستپێکرد و ۹ بارەگای نوێی کردەوە، بە هۆشییەوە ١٨٤ خێزانی ناچار بە جێهێشتنی زێدی خۆیان کردووە و بە بەردەوامیش بۆردوومانی سنووری پارێزگای دهۆک دەکات.