بەپێی هەواڵی کوردپرێس، مەسعوود بارزانی، سەرۆکی پارتی دیموکراتی کوردستان پەیامێکی لە دەیەمین ساڵیادی جینۆساید کردنی ئێزدییەکان بڵاو کردەوە و ڕایگەیاند: جینۆسایدی شەنگال و ئەو تاوانەی تیرۆریستانی داعش ۱۰ ساڵ بەر لە ئێستا دژی خوشک و برا ئێزیدییەکانمان ئەنجامیان دا برینێکە لەسەر جەستەی گەلی کوردستان.

ئەو تاوانە هاوشێوە و درێژەکراوەی ئەو جینۆساید و کۆمەڵکوژی و تاوانانەیە کە بە درێژایی مێژوو بەرانبەر گەلی کوردستان ئەنجام دراوە. خوشک و برا ئێزیدییەکانمان بە هۆی کوردبوون و بیروباوەڕی ئایینیانەوە کەوتنە بەر شاڵاوی ڕق و دڕندەیی تاوانبارانی داعش و جینۆساید کران.

بارزانی دەشڵێت: لە دەیەمین ساڵیادی ئەو کارەساتەدا سڵاو بۆ گیانی شەهیدان و قوربانیانی ئەو تاوانە دەنێرین و، سڵاو بۆ گیانی ئەو پێشمەرگە قارەمانانە دەنێرین کە بۆ شکاندنی ئابڵۆقەی چیای شەنگال و ئازادکردنی شاری شەنگال خوێنیان بەخشی و سەری داعشی دڕندەیان خستە ژێر پێی خوشک و برا ئێزیدییەکانمان و تۆڵەی ئەو ناهەقی و زوڵمەیان لە تیرۆریستان کردەوە.

لە پەیامەکەی مەسعوود بارزانیدا هاتووە: "لەو یادە دڵتەزێنەدا جەخت لەوە دەکەینەوە کە بەهەموو توانایەک پاڵپشتی ماف و داواکاریی خوشک و برا ئێزیدییەکان و دانیشتوانی دەڤەری شەنگالین. پێویستە ڕێککەوتنی نێوان حکومەتی هەرێمی کوردستان و حکومەتی عێراقی فیدڕاڵ لەمەڕ ئاساییکردنەوەی دۆخی شەنگال جێبەجێ بکرێت و ئەو دۆخە نایاسایی و نائاساییەی ۱۰ ساڵە بە ناهەق بەسەر خەڵکی ئەو دەڤەرە سەپێندراوە کۆتایی بێت. پێویستە کۆتایی بەوە بێت لایەنەکان ژان و ئازارەکانی شەنگال بۆ مەرامی سیاسی و خۆسەپاندن و ئاڵۆزترکردنی دۆخی شەنگال بەکار بهێنن و دەبێ ڕێگە بدرێت خوشک و برا ئێزیدیەکانمان لە شەنگال بە سەربەرزی بگەڕێنەوە سەر ماڵ و حاڵی خۆیان و لە ئاشتی و ئارامیدا بژین".