قوباد تاڵەبانی جەخت لە مانەوەی هێزەکانی ئەمریکا لە عێراق دەکاتەوە
پوختەی هەواڵ
بەشی عێراق و هەرێمی کوردستان- جێگری سەرۆکوەزیرانی هەرێمی کوردستان لەگەڵ گلین مایڵز، باڵیۆزی ئوسترالیا لە عێراق کۆ بووەوە.
بەپێی هەواڵی کوردپرێس، لە تەوەرێکی کۆبوونەوەکەدا باس لە دۆخی ئاسایش و سەقامگیری عێراق و ناوچەکە کرا، لەم بارەیەوە جێگری سەرۆکوەزیران جەختی کردەوە کە پێویستە پاراستنی سەقامگیری و ئاسایش ئەولەوییەتی سیاسی هەموو لایەنە عێراقییەکان بێت و خۆیان بەدوور بگرن لە هەرچەشنە هەڵوێست و کردارێک کە مەترسی بۆسەر سەقامگیری عێراق و هەرێمی کوردستان دروست بکات.
قوباد تاڵەبانی ڕاشیگەیاند، تیرۆر هێشتا مەترسییەکی جدییە و گروپە تیرۆریستییەکان لە بۆشاییەک دەگەڕێن بۆ خۆڕێکخستنەوە و تێکدانی ئاسایشی عێراق و ناوچەکە.
لەم چوارچێوەیەشدا و بۆ بنەبڕکردنی هەڕەشەی تیرۆر جەختی کردەوە لەسەر پێویستیی مانەوەی هێزەکانی هاوپەیمانان لە عێراق و دروستکردنی هەماهەنگی و لێکتێگەیشتنی زیاتر لەنێوان هێزە ئەمنییەکانی کوردستان و عێراق لەگەڵ هاوپەیمانان.
بۆچوونی بەکارهێنەران