بەپێی هەواڵی کوردپرێس، ڕۆژی یەکشەممە ۲۶ی تشرینی دووەمی ۲۰۲۳، کۆمەڵێکی زۆر لە مامۆستایانی ناڕازی بەرێکەوتن بەرەو بەغدا بۆ ئەنجامدانی خۆپیشاندان و داواکردنی مافەکانیان، بەڵام لە بازگەی چیمەن لە نزیک کەرکووک رێگرییان لێکرا و بەرپرسانی بازگەکە نەیانهێشت تێپەڕن.

دواتر چەند پەرلەمانتارێک لە عێراق لەوانە موسەنا ئەمین و دارا سێکانیانی ڕایانگەیاند کە حکوومەتی هەرێم داوای لە لایەنی پەیوەندیداری عێراقی کردووە ڕێگری لە مامۆستایان بکات.

وتەبێژی حکوومەتی هەرێمی کوردستان ئەم وتانە ڕەت‌دەکاتەوە و بە دەنگی ئەمریکای ڕاگەیاندووە، "ڕاست نییە و هیچ هەوڵێکی وانییە. هیچ هەولێک لە نێوان حکوومەتی هەرێم و عێراق نییە بۆ ڕێگری لە مامۆستایان، ئەگەر حکوومەتی هەرێم ڕێگری بکردایە لە بازگەکانی خۆیەوە دەیکرد، چ پێویست بوو لە بازگەکانی عێراقەوە بیکات."

پێشەوا هەورامانی باس لەوەش دەکات، هەوڵی ئەوان بۆ گەیشتنە بە رێککەوتن و "ئەگەر هەوڵێک هەبێت بۆ ڕێکەوتنی مووچەیە بۆ مامۆستایان و توێژەکانی تر نەک ڕێگری کردنیان، ئەسڵەن ڕوونە کە هەوڵی مامۆستایان هەوڵی ئێمەشە. ئێمەش هەمان بۆچوونمان هەیە کە ماف و ئیمتیازاتی مووچە و حەقی خەڵکی هەرێم لای حکوومەتی عێراقە".