بەپێی هەواڵی کوردپرێس، هاوسەرۆکی کۆنسەی بەڕێوەبەری کەجەکە هێرشەکەی سەر نەخۆشخانەی مەعمەدانی لە کەرتی غەزە لەلایەن فڕۆکەکانی ئیسرائیلەوە کە لە ئەنجامدا بەهۆیەوە زیاتر لە ٥٠٠ کەس گیانیان لەدەستدا، شەرمەزار کرد و بەیاننامەیەکی لەوبارەوە بڵاو کردەوە.

دەقی ڕاگەیێندراوەکە:

دەوڵەتی ئیسرائیل لە غەززە هێرشێکی ئاسمانی کردە سەر نەخۆشخانەیەک و بەهۆیەوە بەداخەوە سەدان کەس گیانیان لەدەستدا، ئەو هێرشەی کە دەوڵەتی ئیسرائیل ئەنجامی داوە، هێرشێکی کۆمەڵکوژکارانە و جینۆسایدە، ئێمە ئەو هێرشە بە توندی شەرمەزار دەکەین، ئەو ڕووداوەی بەسەر گەلی فەلەستیندا هاتووە، بۆ ئێمەش ئازاربەخشە و مایەی خەم و پەژارەمانە و هەست بە ئازارەکانی گەلی فەلەستین دەکەین، بە تایبەتی خەڵکی غەززە، هەروەها سەرەخۆشی لە تەواوی گەلی فەڵەستین دەکەین.

جارێکی تر پشتیوانیی خۆمان بۆ گەلی فەلەستین و دۆزی ڕەوای ئەوان دووبارە دەکەینەوە، تێکۆشانی گەلان لە دژی ستەم بە دڵنیاییەوە سەردەکەوێت و لێپرسینەوە لە سەرجەم کۆمەڵکوژییەکان دەکەین.