بەپێی هەواڵی کوردپرێس، جەیک سولیڤان، راوێژکاری ئاسایشی نیشتمانیی ئەمریکا لە راگەیێندراوێکدا گوتی: "ئێمە پێشوازی لە گفتوگۆی بنیادنەرانەی نێوان حکوومەتی عێراق و حکوومەتی هەرێمی کوردستان دەکەین کە هەفتەی رابردوو کرا، بە مەبەستی چارەسەرکردنی کێشە هەڵپەسێردراوەکان بەشێوەیەک کە لەگەڵ دەستووری عێراقدا بگونجێت".

لە راگەیێندراوەکەدا هاتووە: "بە بڕیارەکەی حکوومەتی عێراق خۆشحاڵین بۆ ناردنی پارەی زیاتر بۆ حکوومەتی هەرێمی کوردستان کە یارمەتیی دڵنیابوون لە وەرگرتنی مووچەی فەرمانبەرانی حکوومی و بەرەوپێشبردنی سەقامگیری و گەشەی ئابووری دەدات".

راوێژکاری ئاسایشی نیشتمانی ئەمریکا دەشڵێت: "ئەمریکا بەردەوام دەبێت لە کارکردن لەگەڵ هەموو لایەنە پەیوەندیدارەکان بۆ ئەوەی بەخێرایی و لە زووترین کاتدا هێڵی بۆریی نێوان عێراق - تورکیا بکرێتەوە".

جەیک سولیڤان دەشڵێت، ئەمریکا "بەردەوام لە پەیوەندیدا دەبێت بۆ پێشخستنی عێراقێکی سەقامگیر و سەلامەت و پێشخستنی بڕیارە بەردەوامەکان سەبارەت بە پرسە هەڵپەسێردراوەکان".