بەرپرسانی کوردی سووریا جەخت لە سەر ڕادەست کردنەوەی چەکدارە بیانییەکانی داعش دەکەنەوە
پوختەی هەواڵ
بەپێی هەواڵی کوردپرێس، گۆڤاری کاندیان لویێر ڕایگەیاند شاندێکی ناحکوومی لە کەناداوە سەردانی زیندانەکانی ژێر کونترۆڵی کوردەکانی سووریایان کردووە کە ۱۰ هاووڵاتیی داعشی کەنەدی تێدایە و چاوەڕێی دادگای کردن یا گەڕاندنەوە بۆ وڵاتەکەی خۆیانن.
شاندە کەنەدییەکە کە لە پارێزەر و دیپلۆماتکاری پێشوو و چالاکوانانی مافی مرۆڤ پێکهاتبوون لە سەردانەکەیاندا بۆ ناوچەی ژێر کونترۆڵی کوردەکانی سووریا چاویان بە ۱۳ هاووڵاتیی کەنەدی لە کەمپ و زیندانەکاندا کەوت و بارودۆخی ئەو شوێنانەیان زۆر نالەبار وەسف کردووە و داوایان لە بەرپرسانی کەنەدا کرد بەزووترین کات ئەو کەسانە بۆ وڵاتەکەیان بگەڕێننەوە.
بەرپرسانی کوردی سووریا بە شاندە کەنەدییەکەیان ڕاگەیاندووە: ئەوان بەردەوام داوایان لە وڵاتانی بیانی کردووە کە هاووڵاتییە داعشەکانیان بۆ وڵاتی خۆیان بگەڕێننەوە، بەڵام ئەو وڵاتانە ئاوڕیان لە داواکاریی بەرپرسە کوردەکان نەداوەتەوە و لە ئێستادا بەڕێوەبەرایەتیی خۆسەر کەرەستە و هەلومەرجی پێویستی بۆ دادگایی کردنی داعشە بیانییەکان لەبەردەست نییە.
بەگوێرەی ڕاپۆرتی گۆڤاری کاندیان لویێر بەرپرسانی ئیدراەی خۆسەری کوردستانی سووریا بە جید داوایان لە وڵاتانی بیانی کردووە هاووڵاتیانی خۆیان لەو ناوچەیە ببەنە دەرەوە و خۆیان دادگای کردنی هاووڵاتییەکانیان لە ئەستۆ بگرن.
بۆچوونی بەکارهێنەران